Барилгын салбарын чадавх ирэх арван жилд дөрөв дахин нэмэгдэнэ

0
33
Барилга, хот байгуулалтын яам Барилгын тухай хууль, Хөгжлийн бодлого төлөвлөлтийн тухай хуулийг үндэслэн “Төрөөс барилгын салбарын талаар баримтлах бодлого”-ын баримт бичгийг боловсруулан Засгийн газрын 2019 оны 70 дугаар тогтоолоор батлуулсан байна.

Ингэснээр барилгын салбар дунд хугацааны бодлогын баримт бичигтэй болж, төрийн бодлогын залгамж чанар, салбар хоорондын уялдааг сайжруулах, салбарын хөгжлийг судалгаанд суурилсан техникийн нэгдсэн бодлогоор хангах, байгаль орчин, эдийн засаг, нийгмийн хөгжилд тодорхой ахиц гаргах нөхцөл бүрдэж байгаа юм.

Мөн салбарын шинжлэх ухаан, инновацийн тэргүүлэх чиглэлийг тодорхойлсноос гадна, эрдэм шинжилгээ судалгааны байгууллага байгуулах, барилгын салбарт зөвлөх үйлчилгээний тогтолцоо, барилгын төслийн удирдлага, мэдээллийн нэгдсэн систем, олон улсын барилгын гэрээ зэрэг дэвшилтэт үйл ажиллагааг хэрэгжүүлэх зорилт, арга хэмжээг тусгажээ.

Холбоотой Зураг

 Уг бодлогын баримт бичиг нь 8 үндсэн чиглэлийн хүрээнд 8 зорилт, 25 үйл ажиллагааг 2029 оныг хүртэл 3 үе шаттайгаар хэрэгжүүлнэ.

  • “Барилгын салбарын хөгжлийг тогтворжуулах үе”
  •  “Салбарын эрчимтэй хөгжлийн гарааны үе”
  • “Хөгжингүй улс, орнуудын түвшинд хүрч, эрчимжих үе” гэсэн гурван шаттайгаар хэрэгжүүлэх бөгөөд ингэснээр салбарын өнөөгийн чадавх 2020 онд 1.38 дахин, 2025 онд 2.6 дахин, 2028 онд 3.9 дахин өснө гэж тооцож байна.Түүнчлэн барилгын салбарт энэ оны нэгдүгээр сарын байдлаар 400 гаруй барилгын норм дүрэм, 600 гаруй стандарт хүчин төгөлдөр байна гэж Барилга, хот байгуулалтын яамнаас мэдээллээ.