Өнгөрсөн сард гүйлгээнд гаргасан бэлэн мөнгө ₮1 их наяд болж, өмнөх сараас ₮38 тэрбумаар өсөв

Үндэсний статистикийн хорооноос 2022 оны дөрөвдүгээр сарын эцсийн байдлаар нийгэм, эдийн засгийн байдлыг танилцууллаа. Тус мэдээллээс үнийн өсөлтийн мэдээллийг хүргэж байна. 

Дөрөвдүгээр сард улсын хэмжээнд инфляцын түвшин 14.4, Улаанбаатар хотын инфляц 15.2 хувьд хүрчээ. Нийт инфляцын өсөлтийн 4.9 нэгж буюу 34.1 хувийг хүнсний бүлэг эзэлсэн байна. Мөн нфляцын нийт өсөлтийн 56.2 хувь нь импортын гаралтай бараа бүтээгдэхүүний өсөлтөөс хамаарчээ. Инфляцад голлон нөлөөлсөн 10 төрлийн бараа бүтээгдэхүүнийг танилцуулбал,

Энэ үеэр Улсын нэгдсэн төсвийн нийт орлого өмнөх оны мөн үеэс 8.6 хувиар өссөнийг онцоллоо.

Тодруулбал, улсын нэгдсэн төсвийн нийт орлого, тусламжийн хэмжээ энэ оны эхний дөрвөн сарын урьдчилсан гүйцэтгэлээр 5.3 их наяд төгрөг болж, өмнөх оны мөн үеэс 417.9 (8.6%) тэрбум төгрөг, тэнцвэржүүлсэн орлого тусламжийн хэмжээ 4.8 их наяд төгрөг болж, өмнөх оны мөн үеэс 371.3 (8.4%) тэрбум төгрөгөөр тус тус өссөн аж.

График. Улсын нэгдсэн төсвийн тэнцвэржүүлсэн орлого, зарлага, тэнцэл жил бүрийн эхний дөрвөн сарын байдлаар, тэрбум төгрөг

Нийт зарлага, эргэж төлөгдөх цэвэр зээлийн хэмжээ эхний дөрвөн сарын байдлаар 5.1 их наяд төгрөг болж, тэнцвэржүүлсэн тэнцэл 292.4 тэрбум төгрөгийн алдагдалтай гарсан байна. Харин төсвийн алдагдал өмнөх сараас 86.9 хувиар буурчээ.

ҮСХ-ны ХАА, байгаль орчин, үйлдвэрлэлийн статистикийн хэлтсийн дарга Э.Мягмарханд: “Улсын нэгдсэн төсвийн тэнцвэржүүлсэн орлого, тусламжийн хэмжээ өнгөрсөн дөрөвдүгээр сард 1.2 их наяд төгрөг болж, өмнөх сараас 148.5 (13.5%) тэрбум төгрөгөөр өссөн бол нийт зарлага, эргэж төлөгдөх цэвэр зээлийн хэмжээ 1.3 их наяд төгрөг болж, өмнөх сараас 100.6 (7.3%) тэрбум төгрөгөөр буурсан байна.

Улсын нэгдсэн төсвийн орлогод татварын орлогын эзлэх хувь өмнөх оны мөн үеэс 8.5 нэгж хувь, тогтворжуулалтын сангийн орлогынх 5.5 нэгж хувиар тус тус өсжээ. Харин татварын бус орлого 8.7 нэгж хувь, ирээдүйн өв сангийн орлого 5.3 нэгж хувиар буурсан байгаа.

Татварын нийт орлого оны эхний дөрвөн сарын урьдчилсан гүйцэтгэлээр 4.6 их наяд төгрөг болж, өмнөх оны мөн үеэс 770.5 (20.4%) тэрбум төгрөгөөр өссөн. Үүнд,

• Татварын орлого 404.5 (2.2 дахин) тэрбум төгрөг
• нэмэгдсэн өртгийн албан татвар 280 (35.8%) тэрбум төгрөг
• нийгмийн даатгалын орлого 244.3 (39.8%) тэрбум төгрөгөөр өссөн нь голлон нөлөөлсөн” гэв.

Түүнчлэн улсын нэгдсэн төсвийн зарлага, эргэж төлөгдөх цэвэр зээлийн хэмжээ энэ оны эхний дөрвөн сард 5.1 их наяд төгрөг болж, өмнөх оны мөн үеэс 173.2 (3.5%) тэрбум төгрөгөөр өссөн байна.

Мөн Иргэдийн цалин хөлсний орлого өмнөх оны мөн үеэс 0.2%-аар буурсан талаар хэллээ.

Тус хорооны Нийгмийн Статистикийн хэлтсийн дарга С.Тодгэрэл: “Нийгмийн даатгалын сангийн орлого 1.2 тэрбум төгрөг болж, өмнөх оны мөн үеэс 156.7 тэрбум төгрөгөөр өссөн үзүүлэлттэй байна.

Харин тус сангийн зарлага нь 1.2 тэрбум төгрөг болж, өмнөх оны мөн үеэс 172.3 тэрбум төгрөг буюу 16.9 хувиар өссөн.

Өрхийн орлого, зарлагын 2022 оны нэгдүгээр улирлын мэдээг авч үзвэл, үнийн өртгийг арилган тооцсон бодит мөнгөн орлого 1.1 сая төгрөг болж, өмнөх оны мөн үеэс 78 мянган төгрөг буюу 7.5 хувиар өссөн үзүүлэлттэй гарсан.

Тэтгэвэр, тэтгэмжийн орлого 16.6 хувиар өсөхөд өндөр настны тэтгэвэр, тэтгэмжийг нэмэгдүүлсэн, цар тахлын үед өрхийн амьжиргааг дэмжсэн нь нөлөөлсөн байна.

Өрхийн зарлагын хувьд сүүлийн таван улирал дараалан буурч байсан бол 2022 оны нэгдүгээр улиралд өмнөх онтой харьцуулахад өссөн. Бодит зарлага 37 мянга буюу 3.5 хувиар өсөөд байгаа юм.

Хөдөлмөр эрхлэлтийн тоон мэдээллийг танилцуулъя. Ажиллагчдын тоо 1.1 сая болж, өмнөх оны мөн үеэс 73.6 мянгаар өссөн. Хөдөлмөр эрхлэлтийн түвшин 53.1 хувь болж, өмнөх онтой харьцуулахад гурван нэгжээр өсөөд байна.

Ажилгүйдлийн түвшин энэ оны нэгдүгээр улиралд 8.5 хувьтай байгааг өмнөх оны мөн үетэй харьцуулахад 0.3 нэгжээр буурсан үзүүлэлттэй байна.

Цалин хөлсний орлого өмнөх оны мөн үетэй харьцуулахад 0.2 хувиар буурсан” гэлээ.

Өнгөрсөн сард гүйлгээнд гаргасан бэлэн мөнгө ₮1 их наяд болж, өмнөх сараас ₮38 тэрбумаар өсөв