Н.Багабандийн оронд томилогдсон Оюутолгойн ТУЗ-ийн шинэ гишүүн Жамбалдоржийн Тана
Оюу толгойн ХХК-ийн Монгол талын ТУЗ-ийн гишүүнээр Ж.Таныг томилжээ. Өнгөрсөн долоо хоногт Оюу толгойн ТУЗ-ийн гишүүн Н.Багабандийг чөлөөлсөн бөгөөд оронд нь Ж.Таныг томилсон байна.
Тодруулбал, Засгийн газрын хуралдаанаар хэд хэдэн томилгоо хийж байгааг эх сурвалж мэдээллээ. Ингэхдээ Оюу толгойн ТУЗ-ийн асуудлыг хэлэлцэж, Ж.Таныг ийн томилж байгаа юм байна.
Тэрээр томилогдсоныхаа дараа хэвлэлд яриа өгөхдөө “Засгийн газрын урилгаар томилогдож байгаадаа баяртай байна. Монголчуудынхаа төлөө хариуцлагатайгаа ажиллана. Миний хувьд өмнө нь Оюу толгойд ажиллаж байсан, Маккинзи компанидуул уурхай, байгалийн баялгийн чиглэлээр ажиллаж байсан туршлагатай” гэлээ.
Тэрээр 1989 онд төрсөн.
Боловсрол:
2007 онд АНУ-ын Юта мужчин “Васач Академи” бүрэн дунд сургуулийг дүүргэсэн.
2011 онд Харвардын их сургуулийг эдийн засагч, Зүүн Ази судлалаар баклаварын зэрэгтэй төгссөн анхны монгол оюутан.
2016 онд Дэлхийн Эдийн Засгийн Форумын дэргэдэх Глобал Шэйпэрс нийгэмлэгийн нэрэмжит тэтгэлэгийг хүртэж Оксфордын их сургуульд бизнесийн удирдлагын магистрийн зэрэг хамгаалсан.
2012-2013 онд Куинсландын их сургуульд “Байгалийн баялаг, байгаль орчны чиглэлээр диплом хамгаалсан.
Ажлын түүх:
2011-2012 онд Дэлхийн уул уурхайн могулуудын нэг Рио Тинтогийн Австраль дахь компаниад Технологи, инновацийн хэлтэст бизнесийн шинжээч
2012-2013. Онд “Нортпаркс” зэсийн гүний уурхайд бизнесийн шинжээч
2013-2015 онд Оюу Толгой компанийн Нэгдсэн төлөвлөлт болон үйл ажиллагааны төслийн дунд болон урт хугацааны төлөвлөлтийн шинжээчээр тус тус ажиллаж байсан.
Энэ хугацаандаа хамгийн үр дүнтэй гэж үздэг төсөл нь уурхайн төслийн талбай дахь нийт ажилчдын ажлын хуваарийг 28 хоног ажиллаж 14 хоног амардаг байсныг 14/7 болгох төслийг зоригтой санаачлан хэрэгжүүлсэн.
Энэ нь тэнд ажиллаж байсан олон зуун залуус болоод тэдний үр хүүхэд, хань ижил, гэр бүлээс үнэлж барашгүй том талархал хүлээсэн.
Түүнчлэн Ж.Тана нь 2011 оноос “Монголын залуу оюутан хөтөлбөр” буюу Mongolian Young Scholars Program-ийг анх санаачлан үүсгэн байгуулж жил бүр Монголын 30 шилдэг ахлах ангийн сурагчдыг шалгаруулан гадаадын шилдэг их дээд сургуулиудад хэрхэн шалгарч элсэн орох талаар үнэ төлбөргүй сургалтад хамруулан сургадаг бөгөөд үүний үр дүнд эдгээр сурагчдаас Харвард, Станфорд гэх мэтийн дэлхийн олон шилдэг сургуулиудад нилээд олон Монгол залуус элсэн суралцаж байна.
Монголын ерөнхий боловсролын дунд сургуулийн сурагчдыг АНУ болон гадаадын шилдэг их, дээд сургуулиудад суралцах боломжийг нээх, Монгол залуусаа хэрхэн дэлхийн хэмжээний өндөр боловсролыг эзэмшүүлэх зорилго бүхий энэхүү хөтөлбөр нь өдгөө Зориг сантай хамтран амжилттай хэрэгжиж байна.
Мөн тэрээр Дэлхийн Эдийн Засгийн Чуулганы ” Глобал Шэйпэрс” нийгэмлэгийн Улаанбаатар болон Оксфорд дахь гишүүн юм.
